Heilo

Kjersti Wiik har henta fram meir av sangskatten i Nord-Hordaland og Strilalandet rundt Bergen.

For å gjera kulturarven vår tilgjengeleg for folk flest, kom CDen Strilesølv ut i 1997. CDen inneheldt eit utvalg vokale folketonar frå Nord-Hordaland og Strilalandet rundt Bergen, og solgte over 2000 eksemplarar. Ro ro til Siraland inneheld fleire lokale tonar og er ein vidareføring av det viktige formidlingsarbeidet Kjersti Wiik gjer.

Ny interesse for gamal songtradisjon

CDen du no lyttar til, er eit resultat av ei mangeårig innsamling av strilesong i bergenstraktene. Heilt fram til slutten av 1950-åra var denne songen ein viktig del av livet til folk, både til kvardags og fest. I takt med samfunnsutviklinga, forsvann gradvis folkemusikken og folkesongen som bruksmusikk. Lenge var den i ferd med å forsvinne heilt. Born og unge på 1970- og 80-talet kjende ikkje til sin eigen songtradisjon. Det var først på 90-talet Kjersti Wiik sjølv vart merksam på at det fanst ein levande folkemusikktradisjon blant strilane. Ho tok difor initiativet til å samla inn vokal folkemusikk i traktene ved Bergen.

Omfattande bevaringsarbeid

Dei siste fem åra har Kjersti Wiik samla inn omtrent 600 vokale folketonar frå desse regionane. Desse songane er overlevert til Arne Bjørndal Samling i Bergen for arkivering. Slik vert dei bevart for etterslekta. Samstundes har ho ivra for å gjera denne kulturarven tilgjengeleg for folk flest. Wiik har difor drive kvedaropplæring gjennom musikkskular og privatundervisnig. Interessa for å læra å syngja på gamlemåten har vorte svært stor. Det har også vorte mykje konsertverksemd på Vest- og Austlandet, - aleine og saman med kjende musikarar som Sondre Bratland og Iver Kleive.

Opphav og moderne uttrykk

Songane som er presentert på denne plata, spenner frå religiøse til meir verdslege folketonar. For å nå lyttarane av i dag, vert songane presentert i eit moderne uttrykk, men likevel er det lagt vekt på å ta vare på den gamle dåmen i dei. Hardingfela og songstemma er dei opphavlege elementa. Medverkande på Ro ro til Siraland er m.a.: Atle Halstensen: piano, Øyvind Lyslo: gitar, Terje Isungset: perkusjon, Mads Eriksen: el- gitar, Elisabeth Vanebo: tuba, Tellef Kvifte og Laila Kolve: fløyter.